Shërbimi Korrektues i Kosovës dhe Gjykata Themelore në Prishtinë të enjten kanë realizuar për herë të parë seancë gjyqësore përmes videolidhjes.
Siç thuhet në njoftim ky është një hap i rëndësishëm drejt modernizimit të sistemit korrektues dhe gjyqësor, duke kontribuar në rritjen e sigurisë gjatë procedurave gjyqësore dhe duke përmirësuar aksesin e të burgosurve në proceset gjyqësore në mënyrë më efikase dhe të sigurt.
“I burgosuri nga Qendra e Paraburgimit në Gjilan është paraqitur përmes videolidhjes, ndërsa gjyqtarja, Fatime Dermaku ka udhëhequr seancën nga ambientet e Gjykatës Themelore në Prishtinë”, thuhet në njoftimin e Shërbimit Korrektues të Kosovës.
Sipas Shërbimit Korrektues të Kosovës, kjo mënyrë e mbajtjes së seancave gjyqësore përmes videolidhjes synon lehtësimin e procesit gjyqësor, duke zvogëluar nevojën për transport fizik të të burgosurve drejt gjykatave, duke rritur sigurinë dhe efikasitetin në procedura.
“Për realizimin e kësaj seance janë përdorur pajisje të avancuara audio dhe video për incizimin dhe regjistrimin e seancave gjyqësore. Këto pajisje, janë dhuruar nga Byroja për Çështje Ndërkombëtare të Narkotikëve dhe Zbatimit të Ligjit (INL), do të ndihmojnë në lehtësimin e punës së Shërbimit Korrektues dhe përmirësimin e cilësisë së shërbimeve në fushën e drejtësisë”, theksohet në njoftim.
