Vetëm brenda 24 orëve të fundit janë raportuar 4 raste të dhunës në familje, kurse për dhjetë mujorin e këtij viti, janë raportuar 2574 raste të dhunës në familje, ku në pjesën më të madhe të rasteve, viktima ishte grua.
Brenda njëzet e katër orëve të fundit, janë raportuar katër raste të dhunës në familje.
Njëri prej rasteve ka ndodhur në Fushë Kosovë, ku sipas raportit të Policisë, ka pasur edhe të shtëna me armë zjarri.
“Një grua është sulmuar fizikisht nga bashkëshorti i saj, i cili më pas është fjalosur edhe me prindin dhe vëllaun e saj. I dyshuari dyshohet se ka shtënë edhe me armë zjarri të cilën e ka hedhur pastaj nga dritarja.”
E për dhjetë muaj të këtij viti, janë regjistuar 2574 raste të dhunës në familje, ku prijnë rastet ku viktima është grua.
“Gjatë periudhës janar-tetor 2024 janë evidentuar 2574 raste të dhunës në familje, në këto raste të përfshira si viktima kanë qenë 2055 femra dhe 530 meshkuj. Gjatë periudhës janar-tetor 2024 janë evidentuar 5 raste të vrasjeve brenda familjes me 3 viktima femra dhe 2 meshkuj”, kanë thënë nga policia.
Bazuar në këto të dhëna, kërkohet strategji për parandalimin e dhunës dhe jo fokus të jetë vetëm trajtimi i pasojave të dhunës.
“Nga janari deri në muajin gusht të këtij viti, janë raportuar 77 raste të ngacmimit seksual, 47 raste të dhunimit dhe 56 raste të sulmit seksual”, ka deklaruar Behxhet Shala nga KMDLNJ.
