I arrestuar që nga muaji maj i këtij viti, Hysri Selimi seancën fillestare e pati sot.
Ai akuzohet për spiunazh tek BIA serbe, nga data e pacaktuar e deri në kohën e arrestimit të tij.
Në këmbim të një shtëpie, Selimi akuzohet se i kishte dhënë informacione BIA-s serbe, në lidhje me ISIS-in dhe shqiptarët që iu bashkuan kësaj organizate terroriste.
“Paraprakisht e kishin pajisur me tre telefona të mencur e me mjete financiare, duke i premtuar edhe blerjen e një shtëpie, i njëjti me 22.11.2015 kishte udhëtuar në Siri përmes aeroportit të Stambollit me mision të caktuar nga BIA, fillimisht duke iu bashkuar organizatës terroriste ISIS, pastaj dërgimin e informacioneve tek BIA në lidhje me numrin e shqiptarëve pjesëmarrës në organizatën terroriste ISIS”, deklaroi prokurori special, Bekim Kodraliu.
E pas kthimit të tij në Kosovë, fusha e informacioneve që Selimi kishte dërguar tek BIA kishte ndryshuar.
“Si i rekrutuar nga Agjencia e Inteligjencës dhe e Sigurisë së Republikës së Serbisë, që njihet si BIA, në vazhdimësi e ka ndihmuar punën e shërbimit të tillë, në formën e mbledhjes dhe dërgimit të informacioneve në lidhje me veprimtarinë e pjesëtarëve të UCK-së, vrasjet gjatë luftës, personat e radikalizuar dhe numrin e pjesëmarrësve në luftën në Siri”, deklaroi prokurori special.
Për dhënien e këtyre informacioneve dhe jo vetëm, sipas Prokurorisë, Selimi kishte shkuar në vazhdimësi në Serbi.
“Kishte vazhduar të takohej me zyrtarë të BIA-s, më konkretisht me drejtorin për luftimin e terrorizmit në kuadër të BIA-s, Igor Babiq, dhe një zyrtar tjetër, në territorin e Serbisë, si në Vranje, Nish e Bujanoc, të cilët i informonte në bazë të detyrave që ua kishin caktuar praprakisht, e që kishin të bënin me informacione në lidhje me personat e radikalizuar dhe zhvillimin e rrymave vehabiste në Kosovë, ndikimin e tyre, numrin dhe funksionimin e mesxhideve, si dhe informata të tjera të rëndësishme. Ndërsa, si shpërblim për këto informacione zyrtarët e BIA-s e paguanin deri në 700 euro në muaj”.
Për gjitha këto akuza, Hysri Selimi u deklarua i pafajshëm.
“Jam i pafajshëm në tërësi”, deklaroi Hysri Selimi.
Në seancën fillestare mbrojtja e Selimit kërkoi edhe ndalimin e masës së paraburgimit, por që kjo u kundërshtua nga prokuroria.
“Gjatë zbatimit të masave të vecanta hetimore, është konfirmuar se i pandehuri në vazhdimësi ka udhëtuar në territorin e Serbisë, për cka ekziston rreziku se i njëjti mund të arratiset në qoftë se nuk i vazhdohet masa e paraburgmit”, deklaroi prokurori special.
Gjykata refuzoi kërkesën e mbrojtjes për ndërprerje të masës së paraburgimit, derisa u dha afat për kundërshtimin e aktakuzës.
