Në festën e Kurban Bajramit një imam në Kosovë i ka dhuruar një familje katolike në nevojë një shtëpi të re.
Prenk Nreca 41-vjeçar, jetonte në shtëpinë në Pjetërshan me pesë fëmijë të moshave nga 6 deri 11 vjet.
Fshati është në afërsi të Gjakovës dhe rreth 80 kilometra nga Prishtina.
Nreca përkujdeset i vetëm për fëmijët, raporton agjencia AP.
Në Krishtlindjen e fundit, imami Abdurrahman Bejtullahu pa nëpër lajme kushtet e rënda në të cilat jetonte familja Nreca, dhe kështu vendosi të mblidhte fonde për t’ia ndërtuar familjes një shtëpi të re.
Bejtullahu thotë se kur dikush është në nevojë, atëherë feja nuk është ndonjë gjë shqetësuese.
Nreca ka thënë se imami e ndihmoi atë vitin e kaluar gjatë një dimri të vështirë, duke ia paguar për gjashtë muaj një apartament në qytet.
“Falënderoj hoxhën, ka ardhur dhe më ka vizituar në kohë të vështira. Atëkohë ishte dimër. Më ka marrë bashkë me familje dhe më ka siguruar strehim në një banës ku mi ka paguar të gjitha për gjashtë muaj. Ka qenë kohë e keqe dhe puna nuk ka munduar të fillojë për ndërtimin e shtëpisë”, ka deklaruar Prenk Nreca.
Moti ka penguar ndërtimin e shtëpisë së tij të re, thotë Nreca, ndërsa tregon shtëpinë dydhomëshe, që është pranë përfundimit.
“Zoti deshi që të vinte Kurban Bajrami për t’ua bërë befasinë”, thotë Bejtullahu, duke shtuar se së shpejti do t’ia dorëzojë çelësat familjes.