Një 57 vjeçar nga Komuna e Istogut ndërroi jetë javën e kaluar pasi u rrezua nga skelet derisa ishte duke punuar.
Por ky nuk është rasti i vetëm që përfundoi me fatalitet brenda këtij viti.
Pasi edhe nëntë persona të tjerë humbën jetën në vendin e tyre të punës.
Prandaj Jusuf Azemi nga Sindikata e Punëtorëve të Sektorit Privat e quan këtë vit si më të rëndin.
“Viti 2025 është viti më i rëndë, kështu viti me i trishtueshëm, deri në mes apo në fund të prillit nuk kemi pasur mbi 3- 4 raste të vdekjeve për derisa në këtë vit 2025 i kemi 9 raste të vdekjeve, që ka ndodhë që gjatë gjithë vitit nuk i kemi pasur këto raste”, ka thënë Azemi
Kryesindikalisti ka treguar shkaktarët që kanë ndikuar në rritjen e këtyre rasteve.
“Pronarët e kompanive vet fakti që në shumicën e rasteve vdesin punëtorët nuk kanë ndonjë dënim të merituar , vetë fakti që edhe vet punëtoret nga skamja e tyre i obligon shpesh të hyjnë aty edhe ku ka rrezikshmëri të lartë . Por qëllim qëndrim që familjes në mënyrë sociale të ndihmohet e ka bërë t veten dhe kemi ardh deri te këto raste”, shprehet Azemi.
E nga Këshilli për Mbrojtjen e të Drejtave dhe Lirive të Njeriut kanë kërkuar që të formohet një fond i cili do të ndihmonte familjarët e viktimave në vendin e punës. “Duhet që familjet e këtyre punëtorëve që humbin jetën ta kenë një siguri me të materiale dhe duhet shtetit duhet të jetë shumë më i ashpër në shqiptimin e dënimeve dhe prej atyre mjeteve që i inkason duhet ta krijojë një fond të veçantë i cili shkon ekskluzivisht për punëtorët që humbin jetën apo që bëhen të paaftë:, ka thënë Behxhet Shala.
Përveç këtij problemi, Kosova së fundmi është duke u përballur edhe me mungesë të punëtorëve.
“Deri në vitin 2023, sipas të dhënave zyrtare, numri i personave që janë larguar nga Kosova drejt vendeve të ndryshme të botës ka arritur në 359 mijë persona, që përfaqëson rreth 22.6% të popullsisë së vendit, ndërkaq numri i shtetasve shtetasit kosovarë të kthyer si dhe të huajt që jetojnë në Kosovë është rreth 99 mijë persona”, thuhet nga të dhënat e Institutit GAP.
Sipas këtij raporti, sektorët më të prekur nga mungesa e fuqisë punëtore janë ndërtimtaria, tregtia me shumicë dhe pakicë, gastronomia dhe hoteleria, dhe prodhimi, nga të cilët edhe prirja për të emigruar është më e lartë.
