Po luan shah me shokët, por me mendje është diku tjetër.
Këtë të martë, kur edhe po mbahej seanca konstituive e Kuvendit, vëmendja e pensionistit nga Prishtina, Musa Jetullahu, ishte atje.
E për televizionin, tregoi se kë do për kryeparlamentar.
“Ai që punon për këtë popull duhet të fitojë, pa marrë parasysh se cilën parti, nuk jam kundër asnjë partie. Kështu që unë kisha thënë me i dhënë votën të parit që ka fituar e nëse mundet me ideal zot i siguron votat. Nuk i siguron votat ia paftë hajrin le të marrin opozita do të forcohen. Për kryeparalamentar, ma merr mendja që po, Fatmir Limaj, duhet me e u zgjedh, veç e kanë shty, se që e kanë propozuar partitë që janë në Qeveri qind për qind ka me u zgjedh veç e kanë shtyer me hupë kohë e kurgjo tjetër”, tha ai.
Shpresë se do të votohej kryetari i Kuvendit, kishte edhe ky pensionist.
“Sot kam prit, por e kam pa që rregullisht ne jemi patallog njerëz tragjik, të sëmurë kanë hi me sherre, janë të pangopur e negative. Në vend se për hir të historisë e për inat të armikut, sot është dashur me apllauz me u gëzu populli e me zgjedh Qeverinë, jo me shku , zhag se kjo është krejt në dëme të popullit e humbë autoriteti i shtetit”, u shpreh Tahir Llapashtica – pensionist.
Derisa tregoi edhe pritshmëritë që ka nga qeveria e ardhshme.
“Nëse behët Albin Kurti, kurrë s’kemi pas më mirë. Më e mira jo vetëm tash por për 100 vjet. Tash të rijnë janë të zot në krye me Albin Kurtin, u deshtë sot me u bo Qeveria. Për të mirën tonë, për inati të armiqve, për hatër të botës që po na ndihmon e po pretendon prej nesh. Me u bo kjo Qeveri që ka qenë numër një, dy me ndërruar kushtetutën se kjo e dobët, me sjell ligje të reja”, shprehet ai.
E si kërkesë të vetme, pensionisti Fetush Morina, ka rritjen e pensioneve.
Me na bo pensionin sikur që është në Ballkan as më pak e as më shumë, 350 euro është pensioni gjithkund në Ballkan e neve në këtë me na ndihmuar kapak. Pensioni me qenë pension, kjo nuk është pension këto janë ndihma sociale. Prej luftës e tutje ne jemi tu marr ndihma sociale e tash një pension që i vjen era pension 350 euro. Por këtu rrnoft diaspora që po na ndihmon”, thotë Morina.
Pasi dështoi në mungesë të mosvotimit të raportit të Komisionit për verifikim të mandateve, seanca konstituive e Kuvendit, sipas njohësve të fushës, mund të thirret më së largu deri të enjten.
