Ish-mësuesja e shkollës ‘’Pjetër Bogdani’’ në Prishtinë është arrestuar për shkak të pengimit të procesit mësimor. Ndaj saj janë parashtruar shumë ankesa nga prindërit, ndërsa transferi i saj në një tjetër shkollë është bërë me kërkesë unanime të tyre.
Në këtë shkollë dha mësim për vite të tëra.
Por gjatë kësaj kohe, për ish-mësuesen u drejtuan shumë ankesa.
Andaj për shkak të masave disiplinore, ky vit shkollor për të po niste në një ambient të ri.
Kjo pasi që ajo u transferua në një tjetër shkollë në periferi të kryeqytetit.
Megjithatë ish-mësuesja këtë vendim nuk e kishte marrë parasysh.
E në shenjë revolte, ajo ishte paraqitur në shkollën ‘’Pjetër Bogdani’’ edhe të martën.
Në këtë mënyrë, ish-mësuesja kishte penguar procesin mësimor.
“Një ish-mësuese, faktikisht në masa disiplinore që është ndërmarrë që iu ka ndërruar vendi i punës dhe ajo në shenjë të protestës është munduar me e pengua mësimin. Është rast i izoluar, një mësuese që për fajin e saj sepse ka pasur ankesa nga prindërit dhe ne si DKA e kemi marrë vendimin me transferuar në tjetër shkollë…Ankesa ka qenë në mënyrë unanime e prindërve dhe kjo nuk ka qenë hera e parë dhe ne është dashur gjithqysh me marr masa”, tha drejtoresha e Arsimit, Jehona Lushaku-Sadriu.
Prandaj ditën e djeshme ajo u arrestua.
“Është arrestuar e dyshuara femër kosovare, pasi e njëjta kishte penguar procesin mësimor. Me vendim të prokurorit, e dyshuara është dërguar në mbajtje”, thuhet nga Policia e Kosovës.
Sipas burimeve të televizionit, e dyshuara ndodhet akoma në mbajtje për shkak edhe të sjelljeve jo të duhura me zyrtarët policorë.
