Te kampionia e Kosovës në basketboll, Peja, optimizmi është i madh në prag të ndeshjes së radhës në kuadër të stinorit të rregullt të FIBA Europe Cup.
Të mërkurën prej orës 19:00 në palestrën “Karagaçi”, Peja e pret skuadrën e Bundesligës gjermane, Niners Chemnitz. Kjo ndeshje i takon xhiros së katërt të Grupit H, ndërsa “Shqiponjat” synojnë fitoren e tretë rresht.
Te Peja po shpresojnë t’i revanshohen ekipit gjerman për disfatën e thellë që ua shkaktoi në ndeshjen e parë, 98:82. Pas kësaj humbjeje, Peja ka mposhtur Den Boschin e Holandës dhe Spojnia Stargardin e Polonisë, për t’u ngjitur në pozitën e dytë në grup.
Ekipi pejan ka pesë pikë, një më pak se Chemnitzi, që ka tri fitore deri më tani.
Te pejanët besojnë se mund ta mposhtin ekipin gjerman me paraqitje të mira sikurse në dy ndeshjet e fundit evropiane, por edhe me përkrahjen e fuqishme të tifozëve. Në skuadrën e verdhë presin atmosferë të zjarrtë në tribunat e palestrës. Fitorja ndaj Chemnitzit do të bënte që Peja t’i afrohet fazës tjetër
Niners Chemnitz këtë edicion paraqitje të mira po tregon edhe në Bundesligë. Ka bilanc prej pesë fitoreve dhe një disfate dhe së bashku me ekipet ALBA dhe Oldenburg prin në tabelë.
Ndërsa Peja në Superligën e Kosovës i ka fituar të gjitha ndeshjet e deritashme, derisa në fundjavë e mposhti Bashkimin e Prizrenit
