Peja është mposhtur në finale të Ligës Ballkanike në basketboll. Të dielën mbrëma në Stara Zagora të Bullgarisë, Peja u mposht nga skuadra izraelite, Hapoel Beer Sheva. Skuadra pejane u mposht me rezultatin e ngushtë, 101:95.
Në periudhën e katërt Peja disa herë ishte në epërsi të lehtë. Udhëhoqi 78:76 e 85:84. Dy minuta para fundit rezultati ishte i barabartë, 91:91. Por më pas skuadra izraelite realizoi më shumë pikë për të fituar 99:95 në fund.
Në gjysmëfinale, Peja e mposhti Beroen bullgare me rezultat 124:82. Kjo ndeshje u luajt të premten. Ndërkohë, Hapoeli fitoi ndaj Milenijum Kodios së Malit të Zi me rezultat 123:72.
Stinorin e rregullt Peja e kishte përfunduar në pozitën e dytë, pas Hapoelit. David Joseph i shënoi 31 pikë për Pejën. Brad Waldow i kishte 23 pikë për skuadrën kosovare. Ai u shqua edhe me 15 kërcime. Jalen Tate i realizoi 21 pikë. Por ka munguar kontributi më i madh i lojtarëve vendorë.
David Efiyani u dallua te Hapoeli me 28 pikë. Greg Whittington 9 i kishte 23 pikë e tetë kërcime. 18 pikë i shënoi Ben Moore.
Peja është edhe në finale të plejofit në Superligën e Kosovës në basketboll. Do të përballet me Trepçën.
Liga Ballkanike ka pasur telashe të mëdha. Stinorin e rregullt e përfunduan vetëm katër skuadra, nga shtatë sa kishin nisur garimin. Tri të tjera, duke përfshirë Bashkimin e Prizrenit, kanë ndalur në gjysmë garimin.
Peja për herë të parë ishte në finale të Ligës Ballkanike. Kjo ishte liga e parë që hapi dyert për skuadrat kosovare. Por në vitet e fundit mezi ka ekzistuar, ndërsa niveli i skuadrave ishte jo i duhuri.
