Peja ka vazhduar me rezultate të mira në Superligën e basketbollit. Të dielën mbrëma në kuadër të xhiros së 23-të, Peja ka shënuar fitore në shtëpi ndaj Prishtinës me rezultat 89:78.
Derbi i vjetër me Sigal Prishtinën u vendos në çerekun e fundit, me vendasit që arritën të bënin dallimin fal efikasitetit të Dardan Berishës dhe Courtney Fellsit që shënonin nga secila pozitë.
Ndeshja ishte e barabartë deri në periudhën e fundit, kurse të dyja ekipet kishin epërsinë.
Por pejanët falë lojës së mirë në dhjetëminutëshin e fundit krijuan epërsi prej 10 pikëve, 84:74, kur kishte mbetur një minutë nga fundi i ndeshjes.
Courtney Fells ishte më i miri te Peja me 25 pikë, 7 kërcime dhe 6 asiste. Calvin Godfray shtoi 18 pikë e dhjetë kërcime.
Te Prishtina u dallua Jan Palokaj me 17 pikë e pesë kërcime. Peja tani ka 37 pikë. Kurse, Prishtina zë pozitën e pestë me 34 pikë.
