Ministri i Bujqësisë, Faton Peci, ka thënë se janë bërë shtatë muaj që ka denoncuar dhe ofruar të gjitha faktet se disa lokale afariste janë pronë e Ministrisë së Bujqësisë.
Ministri, përmes një postimi në Facebook i ka publikuar pamjet e disa lokaleve afariste, ku ka thënë se janë veprimtari që në to ushtrohet kundërligjshëm.
“Veprimtari që ushtrohet kundërligjshëm sepse s’ka se si të jetë ndryshe kur edhe kundërligjshëm janë ndërtuar e po në atë mënyrë vazhdojnë të funksionojnë. 700 metra katrorë! Oborr i shndërruar në depo! Vepra penale me bollëk!”, ka shkruar Peci.
Ndërkohë, ai ka bërë të ditur se përveç provave të deponuar në Polici e Prokurori, ndihmë kanë kërkuar edhe nga kryetari i Prishtinës, Përparim Rama.
Peci, ka thënë se me Ramën janë dakorduar që të ndërmarrin një aksion përmes Inspektoriatit.
“Përkundër dakordimin me gjasë nuk i ka pa edhe 3 kërkesat e drejtuara përmes emaili, që ta lirojë pronën e Ministrisë dhe t’ia kthejë titullarit. Ata që i kanë lejuar dhe mundësuar këto veprimtari janë emra të përvetshëm e që prokuroria i posedon me fakte. Që nga viti 2012, janë edhe shumë përgjegjës të tjerë që pavarësisht informatave për keqpërdorime, me vetëdije të plotë nuk kanë ndërmarrë asnjë veprim”, ka shkruar ministri. /teve1.info/
