Ministri i Bujqësisë, Faton Peci ka bërë të ditur se nga qershori do të ketë 10 milionë euro grante për sistemin e ujitjes.
Peci gjatë takimit me drejtorin e Bankës Botërore për Kosovë dhe Maqedoninë Veriore, z. Massimiliano Paolucci tha se kjo bankë është duke vazhduar ta mbështesë vendin tonë.
“Kënaqësi ta mirëpres Drejtorin e Bankës Botërore për Kosovë dhe Maqedoninë Veriore, z. Massimiliano Paolucci, me c’rast bashkëbiseduam rreth mundësive të thellimit të bashkëpunimit me synim ngritjen e kapaciteteve bujqësore të vendit përmes investimeve në ujitje. Me qëllim që t’i adresojmë në mënyrë sa më efikase sfidat e sektorit, Banka Botërore si një partner i rëndësishëm vijon ta mbështes vendin tonë nëpërmjet instrumenteve financiare dhe asistencës teknike, me ç’rast kam kënaqësinë që së shpejti përmes fondeve të Bashkimit Evropian dhe partnerit implementues; Bankës Botërore do ta nënshkruajmë një marrëveshje bashkëpunimi për një grant të ri në vlerë prej 10 milionë euro për investime në ujitje”, tha ai.
Tutje ai tha se Ministria e Bujqësisë, Pylltarisë dhe Zhvillimit Rural do të vazhdojë të punojë ngushtë me partnerë vendorë e ndërkombëtarë për të zbatuar projekte dhe iniciativa të përbashkëta që për qëllim kanë mirëqenien e qytetarëve të Kosovës.
