Kryetari i ri i Mitrovicës së Jugut, Faton Peci ka pranuar sot zyrtarisht detyrën nga ish kryetari i këtij qyteti, Bedri Hamza.
Peci në betimin e tij tha se ka ‘ardhur i armatosur për t’i dalë zot qytetit’, transmeton KosovaPress.
“Sot u betova, nuk kam fjalë të mëdha, por kam një premtim të sinqertë kam ardhur i armatosur që ti dal zot qytetit të Mitrovicës… Nga sot dera ime është e hapur për secilin pa dallim me apo pa protokoll. Do të punoë ëme ndershmëri,me zemër,me durim e me drejtësi. Për me kthy dinjitetin e qytetit të Mitrovicës. S’ju premtoj mrekulli, por iu premtoj punë të ndershme çdo ditë… Na duhet angazhim e përpjekje dhe unë jam i gatshëm me dhënë gjithçka nga vetja ime për të arritur këtë objektiv. Na duhet dashni për qytetin, na duhet kujdes, na duhet përkushtim, sepse Mitrovica është jo vetem qyteti ynë, por është edhe zemra e Kosovës. Le të fillojmë një kapitull të ri për Mitrovicën duke ndjerë secili prej nesh peshën e historisë dhe përgjegjësisë duke pasur në mendje e zemër gjithë ata që kanë dhënë jetë për Shqiptarinë, që nga Isa Boletini e deri tek heroi me i ri i Kosovës Afrim Bunjaku”, tha Peci.
Ndërkaq, kryesuesi i seancës solemne, Naser Muja tha se Kuvendi Komunal i Mitrovicës duhet të ketë qëllim të përbashkët përmirësimin e jetës së qytetarit duke lënë anash dallimet politike.
“Sot në këtë sallë kemi përfaqësues të partive të ndryshme politike me qëndrime dhe ide të ndryshme, pra kjo është pasuria e demokracisë, por përtej dallimeve që kemi edhe përgjegjësitë e përbashkëta. Ne duhet t’i shërbejmë qytetarëve të Mitrovicës. Shenja e votës nuk na ka dërguar këtu të debatojmë pa fund, por për të gjetur zgjidhje jo për të krijuar barriera, por për t’i hequr ato, jo për t’u ndarë, por për t’u bashkuar në mision të përbashkët për zhvillimin e qytetit. Ju ftoj të punojmë me respekt për njëri tjetrin me vullnet dhe bashkëpunim me synimet dhe çdo vendim të këtij kuvendit. Mund të kemi mendime të ndryshme, por duhet të kemi një qëllim të përbashkët, përmirsimi dhe jeta e qytetarëve”, tha ai.
Kujtojmë që Faton Peci fitoi garën në zgjedhje lokale duke mposhtur kundërkandidatin e tij në balotazh nga radhët e PDK, Arian Tahiri.
