Kandidati i LVV-së për kryetar të Mitrovicës, Faton Peci, duke falënderuar qytetarët për besimin dhe mbështetjen në ditën e votimit, ka kërkuar durim deri në numërimin e votës së fundit.
Peci ka theksuar se interesat në Mitrovicë janë të mëdha dhe, sipas tij, ato janë shfaqur me intensitet të madh në raportimet e djeshme për rezultatet zgjedhore.
“Dua t’ju falënderoj secilin prej jush për qytetarinë e lartë që treguat dje dhe gjatë gjithë kësaj fushate. Faleminderit për qëndresën dhe qartësinë, për besimin dhe mbështetjen në ditën e votimit, te kutia e votimit. Le të presim deri në numërimin e votës së fundit. Një gjë është e qartë: Mitrovica nuk u thye! Interesat në Mitrovicë janë të mëdha, dhe kjo u pasqyrua dje në mënyrën se si u raportua për rezultatin zgjedhor. Por interesi i Mitrovicës dhe i qytetarëve të saj është mbi të gjitha, dhe bashkë me ju do ta mbrojmë dhe përparojmë atë”, ka shkruar ai në Facebook.
Ndryshe, bazuar në rezultatet preeliminare, në zgjedhjet për kryetar të Mitrovicës, Peci doli i dyti me 47.80 për qind të votave, ndërsa Arian Tahiri i PDK-së doli i pari me 47.89 për qind të votave. Dallimi mes tyre, pa u numëruar votat nga diaspora dhe at me kusht, është 28 vota.
Ndërkohë, Exit-pollet kishin projektuar se Tahiri do të fitojë pa balotazh.
