Kryetari i partisë “Guxo”, Faton Peci deklaroi se Kosova ka nevojë për qeveri stabile. Ai tha se rrugëzgjidhje e vetme mund të jetë një marrëveshje politike për konstituim të kuvendit dhe caktimin e afateve kohore në koordinim me presidenten për mbajtjen e zgjedhjeve të reja.
Para fillimit të seancës konstituive, ku për herë të dymbëdhjetë po tentohet të konstituohet kuvendi, Peci tha se partitë politike mund t’i ftojë Bedri Hamza, e jo partia e tretë apo e katërt, në këtë.
“Përfaqësuesi i Lidhjes Demokratike të Kosovës e ka refuzuar kategorikisht çdo takim dhe pjesëmarrje për të diskutuar rrugëzgjidhje. Në anën tjetër kur ka pasuar letra e dytë dhe oferta konkrete për koalicion, ai e ka marrë një iniciativë në kuptimin e ftesës për partitë politike. Unë personalisht mendoj që i pari që i takon që të ftojë partitë politike është këtë rast kryeministri në detyrë, Albin Kurti, derisa të ezaurohet mundësia që të kemi Kurti 3 me Albin Kurtin kryeministër. Nëse kjo nuk bëhet e mundshme në një të ardhme, unë mendoj që logjika politike dhe institucionale e thotë që potencialisht një ftesë të tillë në një të ardhme mund ta bëjë Bedri Hamzën, por jo partia e tretë e katërt”, deklaroi Peci.
Deputeti Faton Peci, i cili në zgjedhjet e 9 shkurtit garoi në listën e Lëvizjes Vetëvendosje tha se Kosova nuk ka nevojë për qeveri tranzicionale.
