Kandidati për kryetar të Mitrovicës së Jugut, Faton Peci, ka dhënë kritika ndaj bashkëpunimit të mundshëm mes LDK-së dhe PDK-së, duke paralajmëruar se një afrimitet i tillë do ta dëmtonte rëndë Lidhjen Demokratike të Kosovës.
Peci tha se LDK-ja mund të konsolidohet vetëm nëse e sheh si partner politik Lëvizjen Vetëvendosje (LVV), ndërsa çdo bashkëpunim me PDK-në, sipas tij, do ta çonte drejt shkatërrimit.
“Unë kam një mesazh për LDK-në, si në nivel të Kosovës, ashtu edhe në Mitrovicë. LDK-ja mundet t’i konsolidojë radhët vetëm duke e parë partner Vetëvendosjen. Çdo përafrim me PDK-në e çon LDK-në drejt shkatërrimit — historia e ka treguar këtë. Në vitin 2019, LDK-ja dhe VV-ja kishin vetëm 1.7% dallim. Shikoni ku janë sot: LDK-ja në atë kohë kishte 29%, e sot ka vetëm 3% në Mitrovicë. Çdo koketim me PDK-në e shkatërron LDK-në”, deklaroi Peci në emisionin “Mesditë” në Tëvë1.
Peci theksoi se në zgjedhjet e 9 nëntorit, qytetarët kanë mundësinë të zgjedhin “një aktor politik që në të kaluarën ka qenë eksponent i LDK-së”.
“Të ata që më datën 9 i drejtohen kutive të votimit e kanë një mundësi me zgjedh një akter që në të kaluarën ka qenë eksponent i LDK-së, ku ta zëmë që në vitin 2019, PDK-ja dhe grupet kriminale që janë të afërta me to e kanë kidnapuar një djalë të ri, duke menduar që po më kidnapojnë mua. Në atë kohë kandidat ka qenë Mursel Ibrahimi nga LDK-ja”, deklaroi ai.
Ai tha se nuk po sheh reformë në LDK-në, përkundër deklarimeve.
“Çdo përafrim i LDK-së me PDK-në e çon LDK-në në ‘thy qafje’. Është pretenduar se ka reformë, por nuk po e shoh. Uroj që LDK-ja të konsolidohet, nëse e ndjek vullnetin qytetar — dhe vullneti qytetar është që Albin Kurti të jetë kryeministër”, përfundoi Peci.
