Partia Demokratike e Kosovës ka paralajmëruar për anulim të vendimit të Kuvendit Komunal të Prishtinës për këmbimin e tokave në Badovc.
Këtë e ka thënë Leutrim Retkoceri, shef i asamblistëve të Partisë Demokratike të Kosovës në Komunën e Prishtinës, ka paralajmëruar se do ta anulojnë vendimin për këmbimin e tokave në Badovc, duke e konsideruar si të jashtëligjshëm vendimin e kryetarit Përparim Rama.
Ai ka shkruar në Facebook se interesi publik i qytetarëve të Prishtinës do të triumfojë.
“Pasnesër përfundimisht do të bëjmë anulimin e këmbimeve të jashtëligjshme në Badovc të Kryetarit Përparim Rama. Interesi i publik i qytetarëve të Prishtinës do të triumfojë mbi interesin e pronarëve të tokave dhe lajres së borxheve biznesore. E përshëndesim edhe vendimin e Gjykatës Themelore për pezullimin e vendimit të mëparshëm për këmbimin e dëmshëm të pronave në Badovc. Këmbimi milionësh në dëm të qytetarëve dhe komunës do të ndalet përfundimisht pasnesër”, ka shkruar Retkoceri.
Gjykata Themelore të martën ka marrë vendim për shtyrje të zbatimit të vendimit të miratuar nga Kuvendi Komunal i Prishtinës.
