Koordinatorja e Departamentit për Mbrojtje dhe Siguri Kombëtare në Kabinetin për Qeverisje të Mirë të PDK-së, Besa Kabashi-Ramaj, ka akuzuar Qeverinë Kurti se ka dështuar të përgjigjet ndaj provokimeve dhe kërcënimeve serbe, njëherit për mungesë vizioni dhe aftësie në garantimin e sigurisë kombëtare dhe menaxhimin e qëndrueshëm të mbrojtjes.
Në një konferencë të thirrur për media, Kabashi-Ramaj, potencoi se qeveria aktuale ka mangësi në të kuptuarit e partneriteteve strategjike.
“Qeveria ka dështuar vazhdimisht të përgjigjet në mënyrë efektive ndaj provokimeve dhe kërcënimeve serbe, t’i kundërvihet luftës hibride ruse dhe të menaxhojë çështjet e sigurisë së brendshme, duke përfshirë integrimin e institucioneve të sigurisë dhe mbrojtjes, rritjen e qëndrueshmërisë kombëtare dhe përmirësimin e menaxhimit të emergjencave dhe sistemeve të paralajmërimit të hershëm”, ka thënë ajo.
Po ashu, ajo ka rekomanduar që të rishikohet në tërësi Projektligji për Këshillin e Sigurisë së Republikës së Kosovës, duke shtuar se “rrezikon të çmontojë strukturat ekzistuese ligjore, duke dërguar në humbjen e kujtesës institucionale dhe duke shkelur potencialisht të drejtat e punonjësve, sepse mund t’i japë kryeministrit kontroll të tepruar”./teve1.info/.
