Partia Demokratike e Kosovës ka hapur zyrtarisht fushatën për zgjedhjet lokale, me një tubim të organizuar sot në sheshin “Skënderbeu” në Prishtinë.
Kryetari i PDK-së, Memli Krasniqi, iu drejtua qytetarëve me thirrje për mbështetjen e kandidatëve të partisë për kryetarë të komunave, duke theksuar rëndësinë e zgjedhjeve për të ardhmen e vendit.
Ai veçoi kandidatin për kryetar të Prishtinës, Uran Ismaili, si zgjedhjen e duhur për kryeqytetin.
“Ua them me bindje presim fitore në këto zgjedhje në shumicën e komunave të Kosovës sepse i kemi kandidatët për kryetarë të komunave dhe planprogramet më të mira”, deklaroi Krasniqi.
Në fjalimin e tij, kryetari i PDK-së foli edhe për procesin gjyqësor në Hagë ndaj ish-krerëve të Ushtrisë Çlirimtare të Kosovës, duke shprehur besim për një epilog pozitiv.
“Poashtu si popull e si shtet presim dhe një fitore tjetër, fitore të drejtësisë në Hagë për Hashim Thaçin, Kadri Veselin, Jakup Krasniqin dhe Rexhep Selimin dhe bashkëluftëtarët e tjerë të tyre që janë në Hagë. Duke i përshëndetur bashkatdhetarët tanë që nesër mblidhen atje për të ngritur zërin për pastërtinë e luftës së UÇK-së, shpreh besimin tonë se çlirimtarët do t’i kemi të lirë së shpejti në Kosovën tone”, tha Krasniqi.
