Të martën pasdite, kryetari i PDK-së, Memli Krasniqi është takuar me presidenten e Kosovës, Vjosa Osmani në lidhje me propozimin e LVV-së për mandatar për kryeministër, Glauk Konjufcën.
Zëdhënësi i PDK-së, Faton Abdullahu ka konfirmuar për tëvë1.info këtë takim dhe se ka ritheksuar qëndrimin e qartë të PDK-së se nuk do të voton asnjë mandatar nga LVV-ja për kryeministër.
“Po, sot pasdite, Kryetari i Partisë Demokratike të Kosovës, Memli Krasniqi, është takuar me Presidenten Osmani, për t’ia përsëritur qëndrimin e qartë dhe parimor të PDK-së, tashmë të bërë publik edhe përmes komunikatës zyrtare, se në Kuvendin e Kosovës nuk ekziston shumicë për formimin e një qeverie të re nga kjo legjislaturë. Në këtë rrethanë, çdo mandatim i radhës për këdo nga Lëvizja Vetëvendosje do të ishte vetëm një përpjekje e kotë për të fituar kohë, një zvarritje e panevojshme që vetëm se do ta thellonte krizën politike, pasigurinë institucionale dhe humbjen e besimit të qytetarëve në institucione”, thuhet në përgjigjen e Abdullahut./teve1.info/
