Partia Demokratike e Kosovës (PDK) ka reaguar pas shpalljes së përfundimit të konstituimit të Kuvendit nga kryetari Dimal Basha, duke theksuar se një veprim i tillë është në kundërshtim me Kushtetutën.
Sipas PDK-së, Kuvendi ende nuk është i konstituuar pasi nuk është zgjedhur Kryesia në përbërjen e saj të plotë, siç parashihet me nenin 67 të Kushtetutës së Kosovës.
“PDK e konsideron të pakuptimtë ftesën për takim të Kryesisë së Kuvendit që nuk është konstituuar dhe nuk merr pjesë në takime të tilla, të cilat i shërbejnë vetëm agjendave partiake e jo interesit të shtetit”, thuhet në reagimin e partisë.
PDK thotë se ndonëse nuk kishte detyrim kushtetues apo politik, ka marrë mbi vete përgjegjësinë institucionale duke votuar për kryetarin e Kuvendit, vetëm për të zhbllokuar institucionin më të lartë përfaqësues të qytetarëve.
Megjithatë, sipas saj, veprimet e mëtejshme dhe “skemat populiste të Vetëvendosjes” po e dëshmojnë frikën nga hyrja në afatet kushtetuese për krijimin e qeverisë së re.
“Me këtë qasje, Kosova po shtyhet drejt një krize të re institucionale, pasojat e së cilës do t’i bartin shteti dhe qytetarët”, ka përfunduar PDK.
