Kryetari i PDK-së, Bedri Hamza, ka bërë të ditur se Eman Rrahmani do të jetë pjesë e këtij subjekti politik në garën për zgjedhjet e parakohshme që do të mbahen më 28 dhjetor.
Koalicionin e bëri të ditur Hamza në konferencë për media, ku u shpreh i bindur se do të jetë i qëndrueshëm.
“Sot kam kënaqësinë t’ju njoftoj që me z. Rrahmani dhe anëtarë të tjerë të listës Familja kemi bërë marrëveshje për koalicion dhe bashkëpunim para dhe paszgjedhor. Qëllimi i këtij koalicioni është që të bashkojmë forcat në funksion të asaj që të bëjmë progres dhe ta ndryshojmë gjendjen në vend, duke përfshirë ekonominë, drejtësinë, arsimin, shëndetësinë, emergjencat, sigurinë dhe, normalisht, duke pasur kujdes edhe për mirëqenien dhe familjen. Jam i bindur që ky është një koalicion i qëndrueshëm dhe se do të kemi sukses. Normalisht që do të kemi pjesëmarrje nga lista Familja në listën zgjedhore të PDK-së. Është vlerë e shtuar çdo kandidat për deputet që do të jetë në listën e përbashkët”, tha ai.
Eman Rrahmani në zgjedhjet e kaluara i priu Listës për Familjen.
