Partia Demokratike e Kosovës nuk do të marrë pjesë në takimin e Kryesisë së Kuvendit të hënën, me arsyetimin se nuk është konstituuar ende Kuvendi sepse nuk është zgjedhur Kryesia në përbërjen e plotë kushtetuese.
Kryeparlamentari Dimal Basha të shtunën e shpalli të përmbyllur seancën konstituive pas dështimit të votimit të një nënkryetari nga komuniteti serb.
“Në këto rrethana, PDK e konsideron të pakuptimtë ftesën për takim të Kryesisë së Kuvendit që nuk është konstituuar dhe nuk merr pjesë në takime të tilla, të cilat i shërbejnë vetëm agjendave partiake e jo interesit të shtetit”, thuhet në njoftimin e PDK-së.
PDK vlerëson se zvarritjet e qëllimshme në procesin e themelimit të institucioneve shtetërore janë nga LVV.
“Edhe pse nuk kishte detyrim kushtetues apo politik, Partia Demokratike e Kosovës mori mbi vete përgjegjësinë institucionale duke votuar për Kryetarin e Kuvendit, me qëllim të vetëm zhbllokimin e institucionit më të lartë përfaqësues të qytetarëve. Megjithatë, veprimet e mëtejshme dhe skemat populiste të Vetëvendosjes po e dëshmojnë qartë frikën e saj nga hyrja e ligjshme në afatet kushtetuese për të provuar krijimin e qeverisë së re. Kjo qasje, me fajin e tyre, po e shtyn Kosovën drejt një krize të re institucionale, pasojat e së cilës do t’i bartin shteti dhe qytetarët tanë”, thuhet ndër të tjera në njoftim./teve1.info/
