Partia Demokratike e Kosovës dhe Lidhja Demokratike e Kosovës kanë refuzuar votimin e fshehtë për zgjedhjen e kryeparlamentarit të propozuar nga kryesuesi i seancës konstituive të Kuvendit, Avni Dehari.
Ngjashëm ka vepruar edhe Aleanca për Ardhmërinë e Kosovës.
Sipas këtyre subjekteve politike kjo është shkelje e Kushtetutës.
Kryetari i PDK-së, Memli Krasniqi, ka thënë se kjo që po tenton të bëjë VV-ja është e paprecedentë.
“Prej kur e kemi shpallur pavarësinë, kjo është e paprecedentë. Ndoshta prej fillimi të kishit vendos me votim të fshehtë kish pas kuptim. Mos e thelloni krizën, propozone një emër tjetër. Mos e ktheni Kuvendin në cirk. Nuk mund ta impononi në mënyrë arbitrare kryesuesin. Nuk keni të drejtë. As sekretariati nuk duhet me iu ngu kërkesa të paligjshme. Kur nuk i keni votat në mënyrë transparente, si mund t’i keni në mënyrë të fshehtë? A e keni naj pazar që ne nuk e dimë? Po krijoni precedentë anti-kushtetues. Është fyerje për qytetarët”, ka thënë ai.
Deputetja e LDK-së, Hykmete Bajrami deklaroi se kjo është antikushtetuese, e jashtë rregullores së Kuvendit të Kosovës.
“Kjo që po bëni është arbitrare shkelje e rregullores dhe kushtetutës. Ndryshimi i mënyrës së votimit në proces nuk ka ndodhur asnjëherë dhe s’do të bëhemi asnjëherë pjesë e shkeljeve të juaja. S’do të bëhemi asnjëherë pjesë e shkeljeve të juaja. Është e vërtetë që rregullorja nuk lejon debat në seancë konstituive, por gjithashtu është e vërtetë që në asnjë pikë të rregullores thuhet se mundesh të ndryshosh mënyrën e votimit pasi që kemi hy në proces”, deklaroi Bajrami.
Ajo theksoi se “Krejt çka lejohet është që të procedohet në votim.Nëse ju procedoni kjo lëndë do të dërgohet në Gjykatë Kushtetuese”.
