Nga Partia Demokratike e Kosovës u largua më 5 shkurt të vitit 2014.
Por, Fatmir Limaj mund të kthehet në shtëpinë e tij të vjetër në këtë dhjetor të vitit 2025, rreth 12 vite pas largimit nga PDK.
Pavarësisht që në Komisionin Qendror Zgjedhor u regjistrua me subjektin e tij politik, Nismën Socialdemokrate, prapë sytë janë nga Limaj për një bashkëpunim me PDK-në.
Burime të Tëvë1 bëjnë me dije që ka sinjale së Limaj mund të garojë në listën e PDK-së në zgjedhjet e 28 dhjetorit.
Edhe anëtari i PDK-së, Fadil Demaku thotë se dera për Limajn është e hapur pasi elektorati i PDK-së dhe Nismës është gati i njëjtë.
Demaku thotë se diskutimet PDK-Nisma nuk u bënë publikë por ekzistojnë.
Televizioni ka provuar të marrë një qëndrim edhe nga përfaqësuesit e Nismës Socialdemokrate, por të njëjtit nuk ishin të qasshëm.
Kreu i Nismës Socialdemokrate, Fatmir Limaj ka pasur bisedime edhe me Lidhjen Demokratike të Kosovës, por me këtë të fundit kanë treguar se nuk kanë gjetur gjuhën e përbashkët.
Në zgjedhjet e fundit parlamentare, më 9 shkurt, Nisma ishte në koalicion me Aleancën për Ardhmërinë e Kosovës të Ramush Haradinajt.
