Partia Demokratike e Kosovës (PDK) ka njoftuar se do të dorëzojë ankesë në Panelin Zgjedhor për Ankesa dhe Parashtresa (PZAP) lidhur me dyshimet për manipulim të votave në Qendrën Komunale të Numërimit në Mitrovicën e Jugut.
Sekretari organizativ i PDK-së, Betim Gjoshi, përmes një postimi në Facebook ka theksuar se partia është e vendosur të mbrojë integritetin e procesit zgjedhor dhe vullnetin e qytetarëve të Mitrovicës.
“Sot, në mbrojtje të vullnetit të qytetarëve të Mitrovicës, Partia Demokratike e Kosovës do të dorëzojë brenda afatit ligjor ankesë në Panelin Zgjedhor për Ankesa dhe Parashtresa. Vota është e shenjtë në demokraci dhe PDK është e vendosur për të mbrojtur integritetin e zgjedhjeve”, ka shkruar Gjoshi në profilin e tij në Facebook.
