Në bazë të gjetjeve të KDI ka dalë se opozita nuk ka qenë mjaft aktive gjatë këtij sesioni pranveror. Mirëpo, PDK-ja dhe LDK-ja po thonë se kanë qenë mjaft aktiv madje gjatë sesionit vjeshtor do të kërkojnë llogaridhënie nga qeveria sa i përket aferave korruptive.
Në bazë të gjetjeve të Institutit Demokratik të Kosovës del se opozita nuk ka qenë mjaft aktive gjatë këtij sesioni pranveror, pasi deputetët e tyre kryesojnë sa i përket mungesave në seanca plenare, ndërkaq nga 171 pyetje parlamentare vetëm 68 sosh janë bërë nga opozita ndaj ekzekutivit.
Por, kjo po kundërshtohet nga opozitarët.
Ferat Shala, deputet i Partisë Demokratike të Kosovës thotë se opozita nuk është pasive.
“Është brenda kuadrit intelektual dhe legjislativ. Vazhdon të ngrish shqetësimet brenda parametrave të lejuar të demokracisë parlamentare. Sesioni vjeshtor do të jetë me një dinamikë tjetër për të ndryshuar edhe për shkak të aferave që tashmë janë publikuar në medie dhe ne do të kërkojmë llogaridhënie. Sigurisht që do të ketë konsensus që sa më shpejt kjo qeveri të shkojë në shtëpi dhe të kemi zgjedhje të lira e demokratike”, tha Shala
Edhe Deputetja e Lidhjes Demokratike të Kosovës, Valentina Bunjaku-Rexhepi ka vlerësuar punën e opozitë si aktive.
“Nuk mendoj që jemi pasive. Jemi opozitë konstruktive dhe aq sa po mundemi po flasim në parlament. Edhe në parlament asnjë deputet i LDK nuk oshtë pasiv. Opozita ka qenë konstruktive. Po prej shtatorit do të ketë nevojë për të bërë revolucion më të madh. Dhe për me tregu që Kosova të shkoj drejt BE-së. Tani nuk kemi numra për ta rrëzuar qeverinë. Një parti më e vogël e ka nisur këtë iniciativë për mocionin e mosbesimit. Në momentin që i kemi numrat do ta rrëzojmë qeverinë”, thotë ajo.
Të zgjedhurit e popullit do i kthehen punës në Institucionin Legjislativ në javën e dytë të muajit shtator.
Kronika e realizuar nga gazetarja Fitore Berisha
