Valdet Hoxha nga kompania turistike “Teuta Tours” ka shpalosur detaje lidhur me ndalimin e autobusit të tyre me pasagjerë nga autoritetet serbe në kufi.
Hoxha ka thënë se pasagjerët në ato momente kanë pasur frikë, por që gjithçka ka kaluar dhe tani janë afër Zagrebit, rrugës për Slloveni.
“Ka pasur pak frikë, por megjithatë kemi kaluar mirë. Kemi pasur ushqim në autobus dhe për momentin jemi afër Zagrebit duke udhëtuar për Slloveni”, është shprehur ai në emisionin “Ditari” në TËVË 1.
Më tej, Hoxha ka rrëfyer edhe për marrjen në pyetje të pasagjerëve, ku siç njofton ai nga kompania e tyre, janë intervistuar vetëm dy persona.
E pyetjet që u kërkuan kanë qenë të atilla si: prej nga jeni e ku shkoni, ka deklaruar Hoxha duke treguar se intervista ka zgjatur vetëm 5 minuta.
“Janë marr dy persona në pyetje, motive kanë qenë prej nga jeni, ku po shkoni dhe për çfarë po shkoni. I kanë mbajt për 5 minuta në intervistë të shkurtë. I kanë pyetur edhe ku punoni dhe prej cilit qytetet vini si dhe për emrat e rrugëve ku jetojnë. I kanë fut brenda, kanë dhënë intervistën dhe janë kthyer në autobus”, ka shtuar ai.
Ndryshe, autoritetet e Kosovës thanë të mërkurën herët se Serbia ka ndaluar autobusë me udhëtarë nga Kosova, në kufijtë me Kroacinë dhe Hungarinë, si “shenjë hakmarrjeje ndaj mbështetjes nga Asambleja Parlamentare e Këshillit të Evropës për anëtarësimin e Kosovës në këtë organizatë”. /teve1.info/
