Policia e Kosovës ka bërë të ditur se një gruaje i është gjetur një armë zjarri në Aeroportin Ndërkombëtar të Prishtinës.
Sipas njoftimit zyrtar, arma është detektuar në bagazhin e të dyshuarës gjatë kontrollit nga zyrtarët e X-ray-it.
“Me datë 14.10.2025, në Aeroportin Ndërkombëtar të Prishtinës (në dalje), gjatë kontrollit të gjërave personale dhe bagazhit të një pasagjereje – shtetase e Kosovës – nga zyrtarët e X-ray-it është detektuar një armë zjarri. Policia e Kosovës ka reaguar menjëherë duke dalë në vendin e ngjarjes. Pas hapjes së bagazhit në praninë e të dyshuarës, është gjetur arma e zjarrit”, thuhet në njoftim.
Lidhur me rastin, me vendim të prokurorit kujdestar, ndaj të dyshuarës është iniciuar procedurë për veprën penale “Mbajtje në pronësi, kontroll ose posedim të paautorizuar të armës”./teve1.info/
