Pas shtatë muajsh, Laura Fazliu do t’i rikthehet garave për herë të parë, që nga koha kur e fitoi medaljen e bronztë olimpike. 24-vjeçarja,në fund të korrikut të vitit të kaluar, arriti suksesin më të madh në karrierë, duke e fituar medaljen e bronztë në Lojërat Olimpike “Parisi 2024”.
Por që nga ajo kohë ajo nuk ka garuar dhe këtë pritet ta bëjë të shtunën në garën e nivelit Grand Prix, që mbahet në Linz të Austrisë.
Laura është bartëse e parë në kategorinë deri 63 kilogramë, por e pret rrugë jo e lehtë për vend në podium. Rivalen më të madhe mund ta ketë bartësen e dytë, çeken Renata Zachova. Ajo është kampione në fuqi e Evropës. Në këtë kategori paraqiten plot 31 xhudiste, si në asnjë kategori tjetër.
Kosovën në Austri do ta përfaqësojnë edhe Distria Krasniqi dhe Laurinë Gashi. Distria e Laurina garojnë në kategorinë deri 52 kilogramë. Në këtë kategori janë 22 xhudiste, ndërsa Distria është bartësja e parë.
Edhe Distria pushoi gjatë pas Lojërave Olimpike të Parisit. U kthye në fillim të shkurtit, kur fitoi medaljen e bronztë në Grand Slamin e Parisit.
Distria e Laurina garojnë po ashtu të shtunën.
