Presidentja e Republikës së Kosovës, Vjosa Osmani, priti sot në takim të ngarkuarën me punë të Shteteve të Bashkuara të Amerikës në Prishtinë, znj. Anu Prattipati. Të dyja palët diskutuan për zhvillimet e fundit politike në vend, me theks të veçantë te procesi i pritshëm i zgjedhjeve të parakohshme.
Gjatë takimit, Presidentja Osmani ka theksuar domosdoshmërinë që zgjedhjet të zhvillohen në mënyrë të rregullt dhe demokratike.
“Garantimi i një procesi zgjedhor të lirë, të ndershëm dhe transparent është thelbësor për demokracinë tonë. Institucionet do të sigurojnë respektimin e standardeve më të larta demokratike,” u shpreh Presidentja Osmani.
Përveç çështjeve të brendshme politike, u trajtuan edhe tema të ndryshme të bashkëpunimit bilateral mes Kosovës dhe Shteteve të Bashkuara të Amerikës. Presidentja ritheksoi rëndësinë e partneritetit strategjik ndërmjet dy vendeve.
“Kosova mbetet plotësisht e përkushtuar në forcimin e partneritetit me aleatin tonë më të rëndësishëm strategjik – Shtetet e Bashkuara të Amerikës,” deklaroi ajo.
Ndërkohë, znj. Prattipati vlerësoi bashkëpunimin e vazhdueshëm dhe mbështetjen e ndërsjellë, duke riafirmuar rëndësinë e marrëdhënieve të qëndrueshme ndërmjet të dy vendeve.
Në fund të takimit, palët shprehën gatishmërinë për thellimin e mëtejmë të bashkëpunimit në fusha me interes të përbashkët.
