Si pasojë e reshjeve të shtuara atmosferike ditëve të fundit, Instituti Kombëtar i Shëndetit Publik të Kosovës (IKSHPK), në bashkëpunim me Qendrat Rajonale të Shëndetit Publik, ka intensifikuar monitorimin e cilësisë së ujit të pijshëm në të gjithë territorin e vendit.
IKShPK ka bërë të ditur se gjatë kësaj periudhe janë marrë mostra për analiza fiziko-kimike dhe mikrobiologjike nga sistemet publike të ujëfurnizimit.
Sipas IKSHPK-së, situata me ujin e pijshëm më 9 janar 2026 paraqitet e ndryshme nga rajoni në rajon.
Rajoni i Prishtinës
Fabrikat për trajtimin e ujit në Shkabaj dhe Bivolak janë jashtë funksionit për shkak të turbullirës së madhe. Ndërkaq, fabrikat në Badoc dhe Batllavë funksionojnë normalisht dhe cilësia e ujit është brenda standardeve.
Rajoni i Prizrenit
Burimi i ujit nga “40 Bunarët” në qytetin e Prizrenit përdoret vetëm për nevoja teknike, ndërsa burimet Cvilen dhe Soz janë brenda standardeve. Në Suharekë dhe Dragash uji është i pijshëm, ndërsa në Malishevë uji përdoret vetëm për nevoja teknike.
Rajoni i Gjilanit
Në qytetin e Gjilanit uji është brenda standardeve. Në Kamenicë, Viti dhe fshatrat Makresh, Ropotovë, Ranillug dhe Berivojcë janë evidentuar vlera të rritura të turbullirës dhe uji nuk rekomandohet për pije.
Rajoni i Pejës
Në Pejë dhe Istog uji është i pijshëm. Ndërkaq, në Deçan, Junik dhe Klinë furnizimi me ujë është vetëm për përdorim teknik. Po ashtu, në Mbivadë, Vrellë dhe te burimi i Jarinës, uji shfrytëzohet vetëm për nevoja teknike për shkak të turbullirës.
Rajoni i Ferizajt
Uji i pijshëm është brenda standardeve.
Rajoni i Gjakovës
Furnizimi me ujë nga rrjeti i KRU Gjakova është i sigurt për pije. Në Hoqë të Madhe, Opterushë dhe Zaqishtë janë shënuar vlera të rritura të turbullirës dhe uji nuk është i pijshëm.
Rajoni i Mitrovicës
Uji përdoret vetëm për nevoja teknike.
IKSHPK ka bërë të ditur se në koordinim me Qendrat Rajonale të Shëndetit Publik dhe Kompanitë Rajonale të Ujësjellësit do të vazhdojë monitorimin e shtuar të cilësisë së ujit të pijshëm me qëllim të mbrojtjes së shëndetit të popullatës.
