Klubi i basketbollit, GO+Peja, ka reaguar pas pakënaqësive të tifozëve në lidhje me rezultatet e fundit.
Peja të enjten u eliminua nga Kupa e Kosovës duke u mposhtur edhe në çerekfinalen e dytë ndaj Bashkimit të Prizrenit.
Tifozët e skuadrës pejane nuk janë të kënaqur me rezultatet e fundit.
Ndaj Bashkimit, tifozët pak para fundit hedhën mjete tymosëse në parket pas pakënaqësive. Dhe ata më pas akuzuan kryesinë e klubit për gjendjen e krijuar, jo lojtarët.
Peja ka katër disfata radhazi edhe në Superligën e Kosovës në basketboll.
“GO+ Peja është e vetëdijshme për zhgënjimin e madh të tifozëve tanë pas rezultateve të fundit. Si klub me histori, traditë dhe identitet të fortë, ne e kuptojmë plotësisht reagimin emocional të atyre që jetojnë për këtë fanellë dhe këto ngjyra.
Megjithatë, dëshirojmë të theksojmë qartë se çdo formë e dhunës, hedhjes së mjeteve piroteknike dhe prishjes së rendit në parket është e papranueshme dhe dëmton drejtpërdrejt klubin, ekipin dhe vetë qytetin e Pejës. Kryesia merr përgjegjësi të plotë për situatën sportive aktuale. Në ditët në vijim do të ketë diskutime të brendshme dhe vendime të menduara me kujdes, gjithmonë në interesin më të mirë të GO+ Peja. Njëkohësisht, jemi të hapur për dialog me përfaqësues të tifozëve tanë, sepse besojmë se vetëm përmes komunikimit dhe bashkëpunimit mund të dalim nga kjo situatë. Ftojmë të gjithë tifozët që ta mbështesin ekipin në mënyrë sportive dhe konstruktive. Vetëm bashkë mund ta rikthejmë Pejën aty ku e ka vendin”, thuhet në njoftim.
