Pas Prishtinës e Hagës, Tirana është lokacioni i radhës.
Shoqata e veteranëve të luftës kanë njoftuar se me 17 tetor në kryeqytetin shqiptar do të protestojnë për ish-krerët e Ushtrisë Çlirimtare të Kosovës, që po gjykohen në Hagë për krime lufte.
Kryetari i OVL-UÇK-së, Hysni Gucati, ka shpjeguar arsyet simbolike që i kanë shtyrë ata ta mbajnë protestën në Tiranë.
“Gjeneza e Ushtrisë Çlirimtare të Kosovës është në Tiranë. Përgjatë viteve të 90-ta celulat e para të Ushtrisë Çlirimtare të Kosovës janë nga Tirana ku komandanti legjendar, Adem Jashari, Zahir Pajaziti, Luan Haradinaj dhe shumë të tjerë i kanë kryer ushtrimet e para”, ka thënë Gucati.
Gucati ka vlerësim për kryeministrin shqiptar, Edi Rama, që thotë se e ka ngritur zërin në vazhdimësi për Thaçin dhe të tjerët.
“Jemi falënderues ndaj shtetit shqiptar dhe kryeministrit, Edi Rama, që në vazhdimësi e ka ngritur zërin për padrejtësitë që po ndodhin në Hagë me Gjykatën Speciale”, është shprehur tutje Gucati.
Kurse, gazetari nga Tirana, Bledian Koka thotë se qeveria shqiptare do duhej të bënte shumë më shumë për ish-krerët e UÇK-së duke mos u mjaftuar vetëm me deklarata mbështetëse.
“Qeveria shqiptare do të duhej të krijonte një fond për t’i mbështetur ekipet mbrojtëse të ish-krerëve të UÇK-së. Ne mund të flasim tërë ditën por z.Rama ka pasur mundësi për të bërë hapa konkret në këtë drejtim”, ka thënë Koka.
Tutje, Koka ka kritikuar Ramën që nuk e ka mbështetur rezolutën në Kuvend që dënon Serbinë për gjenocid.
“ Nëse z.Rama do ta kishte seriozisht ndjesinë për Kosovën, atëherë le ta pranojë rezolutën që ka propozuar një ditë më parë opozita për të dënuar gjenocidin serb në Kosovë. Pra, le ta nisi nga aktet minimale që i ka në dorë” , ka theksuar Koka.
Nuk është përjashtuar si mundësi që një protestë e tillë në mbështetje të ish-krerëve të Ushtrisë Çlirimtare të Kosovës të organizohet në të ardhmen edhe në Maqedoninë e Veriut.
