Lidhja Demokratike e Kosovës ka thirrur mbledhje të Grupit Parlamentar, pas letrës që kryetari i LVV-së, Albin Kurti, i ka dërguar kryetarit të LDK-së, Lumir Abdixhiku përmes së cilës e ftoi për marrëveshje politike mes dy partive.
Këtë e ka bërë të ditur deputeti i Lidhjes Demokratike të Kosovës, Arben Gashi në një prononcim për media.
“Paska shkruar Hykmejta, ‘nëse jeni afër hajdeni në grup’, tani po shkoj”, ka thënë Gashi.
Sipas tij pavarësisht gabimeve që i ka bërë Kurti, ata duhet të ulen dhe të diskutojnë qoftë edhe për të shkuar në zgjedhje.
“Partitë politike në Kosovë duhet ta shtensonojnë situatën, duhet biseduar edhe refuzimin duhet ta bëjnë në tavolinë edhe të gjitha, ky është mendim personal i imi. Gabimet që i ka bërë Kurti janë të përsëritura por në fund ne duhet të ulemi dhe të diskutojmë qoftë edhe për të shkuar në zgjedhje. Pra duhet të ulemi dhe të gjejmë zgjidhje. Qoftë edhe duke i thënë zotit Kurtit që ti i ke 48 deputetë vazhdo ose tërhiqu nga mundësia e formimit të qeverisë pra ka plot opsione. Nuk do të thotë ulja në tavolinë koalicion”, ka thënë ai.
