Të hënën, kandidatja për deputete e Lidhjes Demokratike e Kosovës ishte e ftuar në emisionin “Infonata” në Tëvë 1.
Mes tjerash, Gaxherri foli edhe për punën e kryeministrit Kurti gjatë këtij mandati.
E pas kësaj interviste, ish-deputetja thotë se është kërcënuar përmes rrjeteve sociale.
“Me datën 13 isha në intervistë tek ju, dhe jo atë natë të nesërmen kishin pasuar komentet me qindra, tejet fyese, denigruese por nga komentet një kishte fyerje edhe denigrim, kishte edhe kërcënimin e drejtpërdrejtë dhe pastaj unë e pashë të arsyshme se këtë duhet ta lajmëroj në Polici”, tha Gaxheri.
Kandidatja për deputete, fajin për këtë kërcënim ia lë kryeministrit aktual, Albin Kurti.
“Bazuar në gjuhën fyese, denigruese, kërcënuese, polarizuese që e ka këto ditë kryeministri Albin Kurti, gjatë fushatës dhe parafushatës, natyrisht simpatizantët e tij kanë marr zemër dhe ju duket se është mirë ashtu, ashtu siç shprehet kryeministri dhe këta pretendojnë pastaj me ia kalu kryeministrit me ju afru atij me afër”, tha ajo.
E nga Policia kanë bërë të ditur se janë duke e hetuar rastin.
“Është njoftuar prokurori, rasti është cilësuar si kanosje po punohet në mënyrë intensive për identifikimin dhe kapjen e të dyshuarit”, tha zëdhënësi i policisë për rajonin e Pejës, Fadil Gashi.
Edhe nga Prokuroria në Pejë janë vënë lëvizje.
“Prokurori I shtetit ka autorizuar policen e Kosovës te hapet rast për veprën penale Kanosje si dhe ka autorizuar te identifikohet presoni I dyshuar, te lokalizohet dhe arrestohet”, tha zëdhënësi i Prokurorisë në Pejë, Shkodran Nikçi.
Kujtojmë që ditë më parë Policia e Kosovës ka arrestuar një person i cili dyshohet se ka kanosur përmes Instagramit kryeministrin Albin Kurti.
