Pas disfatës që e pësoi të dielën e kaluar, Barcelona kërkon të reagojë për të mos e humbur hapin me rivalin kryesor, Real Madrid, në garën për titull kampioni.
Barça u mposht nga Reali me rezultatin, 2:1, duke mbetur kështu pesë pikë prapa në garën për kreun e tabelës në La Liga.
Barça ka 22 pikë në vendin e dytë, kurse Reali pesë më shumë në pozitën e parë.
Gjiganti katalunjas të dielën nga ora 18:30 e pret Elchen, në kuadër të javës së 11-të.
Barça është kampione në fuqi.
Elche ka 14 pikë dhe e zë vendin e tetë.
Barcelona nuk është në seri të mirë të rezultateve. Në pesë ndeshjet e fundit në të gjitha garat ka tri disfata dhe dy fitore.
Barça është e pamposhtur në 24 ndeshjet e fundit në La Liga në shtëpi kundër Elches.
Skuadrës që drejtohet nga Hansi Flick do t’i mungojë mesfushori kryesor, Pedri, i cili ka pësuar lëndim dhe pritet të jetë jashtë fushës për disa javë.
Ndërkohë Reali synon që ta vazhdojë ecurinë e mirë të rezultateve.
“Los Blancos” të shtunën nga ora 21:00 e presin Valencian.
Reali ka vetëm një humbje në të gjitha garat që nga fillimi i edicionit 2025/26.
Madrilenëve humbjen e vetme ua shkaktoi Atletico Madridi më 27 shtator.
Valencia është ekipi i fundit që e ka mposhtur në elitë Realin në “Santiago Bernabeu”.
Valencia ka nëntë pikë në pozitën e 18-të.
Skuadra tjetër nga Madridi, Atletico, të shtunën nga ora 16:15 luan në shtëpi me Sevillan.
