Kërkesa e shefes së shtetit, Vjosa Osmani po mirëpritet nga përfaqësuesit e partive politike.
Por ajo çka mbetet e paqartë është çka ndodhë pas tri ditëve, kur është afati i fundit për konstituim nga Gjykata Kushtetuese.
Kryetari i Partisë Demokratike të Kosovës, Memli Krasniqi thotë se pikëpyetje është se a kanë të drejtë konstituojnë kuvendin në ditën e 31-të.
“Ne kemi dërguar një lëndë në Gjykatën Kushtetuese, besoj edhe LDK po ashtu dhe deri tash nuk kemi marrë një aktgjykim. Kemi pritur shumë që kjo të ndodhë para datës 26, janë edhe tri ditë ndoshta do ta qartësonte së paku pjesën e votimit të fshehtë i cili në leximin tonë dhe të gjithë ekspertëve përveç atyre ekonomistëve të Vetëvendosjes që janë bërë ekspertë ligjor, të gjithë të tjerët e dimë që ndryshimi i rendit të ditës nuk mund të ndodhë. Nëse ne nuk arrijmë që ta konstituojmë kuvendin brenda 30 ditëve, pikëpyetje e madhe është se a kemi të drejtë ta konstituojmë në ditën e 31-të”, tha Krasniqi.
Edhe i pari i Lidhjes Demokratike të Kosovës, Lumir Abdixhiku kërkon qartësim për këtë.
Madje ai mendon që ka edhe shkelje kushtetuese.
“Vendit i duhet qartësim se çfarë ndodh pas periudhës 30-ditore dhe kalimit të afatit të dhënë nga Gjykata Kushtetuese. Kemi një paqartësi me aktgjykimin e parë deri tani, dhe nuk kemi dyshim se tashmë ka edhe shkelje kushtetuese në lëndën tonë të dërguar në Gjykatën Kushtetuese”, u shpreh Abdixhiku.
Që angazhimi i presidentes Osmani do e ndryshoj gjendjen, shpreson kreu i Aleancës për Ardhmërinë e Kosovës, Ramush Haradinaj.
“Tani besoj që ky angazhim është i nevojshëm. Kanë qenë dy opsione, një që të lejohet të kryhet krejt afati 30 ditor e pastaj me u kyç presidentja që do të ishte çka pastaj. Mendoj se kjo e ka edhe këtë përparësi sado që mund të kemi mendime të ndryshme që na i fiton disa ditë. Disa ditë të afatit 30 ditor që do të kishin mundësi të shpenzoheshin tani mund të ruhen që t’i kemi në të ardhmen kurdo që krijohet mundësia”, tha Haradinaj.
E kryetari i Nismës Socialdemokrate, Fatmir Limaj thotë se ky pezullim iu ndihmon partive politike të arrijnë një marrëveshje.
“Besoj që ka zhvillime të reja nga dje dhe kjo situatë ka shkuar aq gjatë, saqë është dashur të përfshihet edhe Presidentja. Mendoj se kërkesa e saj drejtuar Gjykatës Kushtetuese ndihmon jo vetëm në procedimin e konstituimit të Kuvendit, por edhe për të ardhmen. Po t’i japim mundësi partive politike në këtë kohë pezullimi të përkohshëm që ka parashikuar Presidentja, mund të arrihet një shumicë dhe ndoshta një marrëveshje”, tha Limaj.
Prej Vetëvendosjes, shpresat i kanë në Nismën Socialdemokrate.
“Ne po presim një përgjigje prej këtij subjekti politik. Jemi optimist se do të kemi një përgjigje pozitive të paktën deri në fund të kësaj jave, pasi po i afrohemi datës 26 korrik, kur edhe konsumohet 30-ditëshi në a aktgjykimin e Kushtetueses. Një gjë e tillë duhet të ndodh para këtij afati sepse e kemi obligim dhe përgjegjësi secili prej deputetëve, pa marrë parasysh subjektet politike që të kontribuojë në konstatimin e Kuvendit”, tha Arbëreshë Kryeziu –Hyseni.
Të premten, është hera e 52-të që ligjvënësit mblidhen për të tentuar konstituim të Kuvendit të Kosovës.
E të shtunën, 26 korriku është afati i fundit për konstituim nga aktgjykimi i Gjykatës Kushtetuese.
