Të dielën, shteti i Kosovës u përmend nga Shtetet e Bashkuara të Amerikës.
Presidenti i Amerikës, Donald Trump tha se do të zgjidh çështjen në mes Kosovës dhe Serbisë.
Këtë deklaratë e ka mirëpritur partia fituese e zgjedhjeve të 9 shkurtit, Lëvizja Vetëvendosje por kanë thënë se trysnia duhet të jetë mbi Beogradin.
“Ata janë partnerë strategjik, prandaj roli i tyre është i domosdoshëm, ata të cilët në vazhdimësi kanë qenë destruktiv në këtë proces është Serbia, andaj ka qenë dhe është tejet e rëndësishme që ky presion të vendoset mbi Serbinë”, tha Haxhiu.
Përmendjen e Kosovës nga Trump-i si pozitive e kanë parë edhe nga Partia Demokratike e Kosovës.
Madje Kryetari i këtij subjekti, Memli Krasniqi e sheh këtë si një nga temat që do merret Trump-i gjatë këtij mandati.
“Unë e shoh pozitivisht faktin që Trump e përmend Kosovën dhe e shef si një nga temat të cilat ai do të merret gjatë mandatit të tij, por pasi të mendojmë për pozicioni e ShBA-së, vërtetë neve na takon të mendojmë ku është Kosova sot dhe bllokada e cila po vazhdon është e dëmshme edhe për pozicionin e Kosovës. Ka një kërkesë nga ShBA-të për të pasur një më proaktive në raport me marrëveshjen potenciale mes Kosovës dhe Serbisë. Nëse ne nuk i kemi institucionet e konsoliduara kjo gjithsesi që e dëmton pozicionin e Kosovës”, tha Krasniqi.
E këtë deklaratë të Trump-it të përafërt me atë të Lidhjes Demokratike të Kosovës e ka parë Lutfi Haziri.
“Paralajmërimi më i madh që duhet me pasë parasysh është rikthimi te ajo që ai e quan dëmtim i procesit të paqes. E konfirmon qëndrimin e LDK-së që marrëveshja e Ohrit ka qenë e dëmshme. Ne besojmë që do të ketë koordinim mes BE-së dhe administratës Trump. Roli i Trumpit në procesin e paqes do të jetë kritik dhe duhet me u bë gati. Kjo që po ndodh sot, është vonesë e madhe, që nuk arsyetohet dhe është bërë e neveritshme”, ka vlerësuar Haziri.
Këto deklarata i komentoi edhe i pari i Nismës, Fatmir Limaj.
Trump në deklaratën e tij në rrjete sociale tha se e ka ndaluar një luftë të mundshme në mes Kosovës dhe Serbisë.
