Ende nuk është e qartë rruga se si do të shkohet drejtë zgjedhjeve të jashtëzakonshme në katër komunat veriore.
Bashkësia ndërkombëtare po preferon dorëheqjet e kryetarëve aktual, ndërsa qeveria thotë se te zgjedhjet duhet të shkohet me anë të peticionit.
Ambasadori i Bashkimit Evropian në Kosovë, Tomas Szunyog, tha se qëndrimi i BE-së për këtë çështje qëndron tek deklarata e 3 qershorit.
“Pozicioni ynë është mjaft i qartë. Ne kemi një deklaratë të përbashkët të lëshuar nga përfaqësuesi i lartë Borrell në emër të 27 shteteve anëtare, më 3 qershor. Kjo është për ne politika e bashkimit evropian dhe e çdo shteti anëtar të bashkimit evropian”, tha Szunyog.
Tanimë në çështjen e zgjedhjeve janë implikuar edhe masat që BE ka vendosur ndaj Kosovës.
Kryeministri i vendit Albin Kurti, thotë se logjikisht, masat duhet të hiqeshin para mbajtjes së zgjedhjeve.
E deputetja e Lëvizjes Vetëvendosje, Arbëreshë Kryeziu, thotë se heqja e masave para zgjedhjeve do të ishte një lloj mirëbesimi mes Kosovës dhe BE-së.
Bashkësia ndërkombëtare pret që në zgjedhjet e radhës në katër komunat veriore, do të marrinë pjesë edhe pakica serbe në mënyrë që ato të mos kenë fatin e zgjedhjeve paraprake.
