Partia Liberale ka dal fituese në zgjedhjet federale në Kanada pas votimit të së hënës, ku udhëheqësi i kësaj partie dhe kryeministri aktual, Mark Carney, do të mbetet në detyrë duke formuar një qeveri të re me një kabinet të ri.
Ende është e paqartë nëse liberalët do të kenë shumicën në Parlament apo nëse do t’u duhet të kërkojnë aleanca me parti të tjera, raporton AP.
Një parti ka nevojë për 172 vende në Parlament, nga 343 që janë në total, për të krijuar shumicën.
Kryeministri zgjidhet nga parlamenti dhe jo drejtpërdrejt nga votuesit.
Historikisht, partia që mbledh shumicën në Dhomën e Komunave — qoftë e vetme ose me mbështetjen e një partie tjetër — formon një qeveri. Kjo pritet të ndodhë në ditët në vijim.
Sfida kryesore me të cilën pritet të përballet në politikën e jashtme është marëdhënia e tensionuar me SHBA-të, pasi presidenti, Donald Trump e ka kërcënuar Kanadanë me tarifa të larta dhe ka kërkuar që Kanadaja të bëhet shteti i 51-të.
Në një fjalim fitoreje para mbështetësve në Ottawa, Carney theksoi rëndësinë e unitetit kanadez përballë kërcënimeve të Uashingtonit. Ai tha gjithashtu se sistemi i dobishëm reciprokisht që Kanadaja dhe SHBA-të kishin ndarë që nga përfundimi i Luftës së Dytë Botërore kishte mbaruar.
“E kemi kaluar tronditjen e tradhtisë amerikane, por nuk duhet t’i harrojmë kurrë mësimet”, tha ai.
Udhëheqësi aktual liberal është Carney, i cili u betua më 14 mars si kryeministër pasi Justin Trudeau dha dorëheqjen. Tani, ai fitoi një mandat të plotë si kreu i qeverisë.
Carney, një ekonomist 60-vjeçar i arsimuar në SHBA dhe Angli, nuk kishte përvojë në politikë derisa pasoi Trudeau-n si kryeministër në mars.
Tani, pasi votuesit u dhanë fitoren liberalëve, Carney do të udhëheqë Kanadanë.
