Parlamenti i Ukrainës ratifikoi të enjten një marrëveshje të rëndësishme për mineralet me Shtetet e Bashkuara, duke hapur rrugën për krijimin e një fondi të përbashkët investimi mes dy vendeve.
Ligjvënësi ukrainas, Yaroslav Zheleznyak njoftoi se marrëveshja kaloi me 338 vota pro, pa asnjë votë kundër apo abstenim — shumë mbi shumicën e nevojshme prej 226 votash.
Votimi ndodhi ndërsa Rusia dhe Ukraina raportuan sulme të reja, pavarësisht një “armëpushimi” 72-orësh të shpallur në mënyrë të njëanshme nga presidenti rus, Vladimir Putin për të përkuar me festimet e Ditës së Fitores në Moskë.
Zyrtarët ukrainas njoftuan për bombardime dhe sulme me artileri përgjatë vijës 1,000-kilometërshe të frontit, përfshirë sulme vdekjeprurëse në rajonet e Sumyt dhe Donetskut, raporton AP.
Ministri i Jashtëm i Ukrainës, Andrii Sybiha, e quajti armëpushimin një “farsë”, duke thënë se Rusia e kishte shkelur atë 734 herë brenda 12 orëve të para.
“Nuk do të lejojmë që Putini t’i mashtrojë të tjerët,” shkroi ai në platformën X.
Megjithëse dhuna vijoi, sulmet e përditshme me raketa dhe dronë — të zakonshme javët e fundit — nuk janë regjistruar që nga mbrëmja e së mërkurës, sipas forcave ajrore të Ukrainës.
Në të njëjtën kohë, vëmendja u përqendrua edhe në Moskë, ku presidenti kinez Xi Jinping mbërriti për një vizitë katërditore dhe u prit si “mysafiri kryesor” në paradën e së premtes.
