Kjo e martë nuk ishte fortë e zakonshme për të.
Në emocione, por i lumtur, mëngjesin zgjodhi ta nis para zyreve të partisë së tij.
Kjo pasi për rreth dy orë priste të shkonte në Kuvend, e të betohej si deputet.
Por më të mëdha se emocionet, Paris Guri nga LDK tha se e ka përgjegjësinë para atyre që e kanë votuar.
“Natyrisht që ka emocione por përtej emocioneve është edhe një lloj doze e madhe e përgjegjësisë që të bie mbi supe kur e din që ke me i përfaqësu interesat dhe një numër të madh të votuesve, e sidomos kur krejt kjo kur ti je deputet i një subjekti politik siç është LDK”, ka thënë për Tëvë1 deputeti i zgjedhur LDK-së.
Në 2022-ën, ai u zgjodh kryetar i Forumit të Rinisë së LDK-së.
E zgjedhja e tij si deputet, thotë se i erdhi pikërisht nga të rinjtë e Kosovës.
Është një shpërblim i punës që e kemi bërë me të rinjtë, për të rinjtë gjatë krejt kësaj kohe. Mendoj që jam deputet i rinisë dhe gjatë krejt mandatit tim si kryetar i Forumit të Rinisë i kam përfaqësuar interesat e rinisë dhe tash rinia ka vendos që me ma jep këtë numër të votave që me u siguru që kanë me pas edhe zërin e tyre në Kuvend”, ka thënë Guri.
Gjatë mandatit të tij në Kuvend, Guri ka edhe një tjetër qëllim.
“Kam vendos që me qenë njëri prej deputetëve më transparent në Kuvend dhe me u mundu përmes videove, përmes platformave sociale që me i mbajt të informuar për gjithçka që është duke u zhvilluar brenda”, thotë ai.
Kështu, i erdhi ora të nisej për në Kuvend.
Por, pavarësisht që arriti në kohë e me plot entuziazëm, Paris Guri nuk arriti të betohej, pasi nuk u miratua raporti i Komisionit për verifikimin e mandateve.
Guri, në zgjedhjet e 9 shkurtit, mori plot 18 mijë e 650 vota.
