Presidentja e Kosovës, Vjosa Osmani, po vazhdon qëndrimin në SHBA, ku po mbahet sesioni i 78-të i Asamblesë së Kombeve të Bashkuara. Nga atje, Osmani ka publikuar fotografi me presidentin e SHBA-ve Joe Biden dhe ish-presidentin, Bill Clinton. Njohësit e protokollit shtetëror, për Tëvë1 i kanë zbërthyer mesazhet që përcjellin këto fotografi.
Nga e diela po qëndron në Shtetet e Bashkuara të Amerikës.
Kjo meqë presidentja e Kosovës, Vjosa Osmani, po merr pjesë në sesionin e 78-të të Asamblesë së Kombeve të Bashkuara.
E të enjten, Osmani u takua edhe me presidentin amerikan, Joe Biden.
Por, ajo që ra në sy, është shtrëngimi i duarve që dy presidentët, e bën gjatë fotografisë së përbashkët.
“Është një shtrëngim i cili flet shumë më shumë se 1 mijë fjalë, kjo jep një mesazh jo vetëm miqësie por edhe ngrohtësie. Ky gjest mes dy presidenteve, është (mesazh) që njeri-tjetrin e mbështesim shumë në çdo lloj sfide e kohe. Shtrëngimi i duarve nga Osmani është edhe një shtytje shtesë është që ajo kërkon që Amerika të jetë pranë shtetit tonë”, ka thënë Tomorr Avdia, njohës protokollit shtetëror.
Njohësi i protokollit shtetëror, Tomorr Avdia, ka komentuar edhe fotografinë e shefes së shtetit me ish-presidentin amerikan, Bill Clinton dhe ish-gjeneralin e NATO-s, Wesley Clark.
“Në rast kur është një vendosje mes dy personave, dihet që kur ndodh shkëmbimi i duarve një pjesë e shpinës mund të kthehet nga personi tjetër dhe e kundërta dhe kjo foto është kapur në këtë moment”, është shprehur Avdia.
Avdia thotë se për shtetet si Kosova, takimi i personaliteteve të mëdha në ngjarjet e tilla, nuk është i lehtë.
“Kosova nuk është anëtare e OKB-së, dhe si një shteti tillë, me një status të tillë ajo e ka të vështirë lëvizjen, qëndrimin dhe vendosjen në vendet ku janë shtetet anëtare. Kosova në këtë rast e shfrytëzon ndihmën e shteteve tjera, aleate mike, kryesisht të Shqipërisë, për të qenë pjesë e këtyre takimeve, në hapësirat që janë pjesë e nivelit të dytë apo të tretë”, është shprehur Avdia.
Në këto takime nga Presidenca e Kosovës u tha se do të bisedohet për zhvillimet e fundit në Kosovë dhe anëtarësimin në organizatat ndërkombëtare.
