Të parin e dënoi me 22 vjet, e të dytin, me 18.
Në këtë formë, Gjykata Speciale më seli në Hagë, i shqiptoi dy dënimet e para për krime luftë në Kosovë.
Bëhet fjalë për ish-pjesëtarët e Ushtrisë Çlirimtare të Kosovës, Salih Mustafën e Pjetër Shalën.
Por, më këtë vendim nuk po pajtohen disa ish-luftëtarë të UÇK-së në Ferizaj.
Ismail Selmani, nga iniciativa “Të gjithë për luftëtarin”, tregon se si u ndje kur e pa se po i dënoheshin ish-bashkëluftëtarët.
“Vërtetë jam ndier shumë keq, në moment kam thënë: Pse o Zot, nuk vdiqa edhe unë në frontet e luftës, vetëm të mos i ndiej këto dënime të bashkëluftëtarëve tonë”, tha Selmani.
Ndërkohë, për këtë, komandant Mala, ka një thirrje.
“Protesta të nisë sa më shpejt që është e mundur, por jo vetëm në Prishtinë, në të gjitha qytetet e komunat e shtetit të Dardanisë. Iniciativa kërkon nga Ministria e Ekonomisë të të gjithëve veteranëve të luftës që të shkojmë në Hagë dhe t’i përgjigjemi Hagës”, tha tutje ai.
Nga kjo iniciativë, thirrje po iu bëjnë edhe organizatave të dala nga lufta.
“Unë iu bëj thirrje shoqatave të dala nga lufta, që të organizohen edhe ata dhe le të vijnë e të na bashkohen për krerët tonë, që janë padrejtësisht në Hagë. Sepse pa ata krerë, sidomos pa Hashim Thaçin, Jakup Krasniqin, Rexhep Selimin e Kadri Veselin, ata janë shtylla e këtij veni”, tha Zenel Kryeziu nga “Të gjithë për luftëtarin”.
Ndryshe, përveç këtyre dy rasteve, në Hagë po vazhdon të zhvillohet procesi gjyqësor, ndaj ish-krerëve të UÇK-së, në rastin “Thaçi dhe të tjerët”.
