Aliu ka thënë se disa zona të Dukagjinit mund të preken më së shumti nga vërshimet.
“Nesër gjatë natës do të kemi intensifikim të reshjeve kryesisht në pjesën veriore, perëndimore dhe veriperëndimore Dukagjinit, në pjesë të tjera do të ketë pak reshje, kryesisht të intensitetit mesatar. Mendoj se në Dukagjin ka mundësi të ketë përmbytje dhe vërshime. Sigurisht se sektori i hidrologjisë do të jep një mendim më profesional por shihet se ka mundësi që të ketë reshje të dendura të cilat mund të shkaktojnë vështirësi”, ka thënë ai në “Ditari” në Tëvë 1.
Ai po ashtu ka parashikuar që të fryjnë erëra të forta, po ashtu në rajonin e Dukagjinit.
“Në bazë të parametrave që kemi, vendi ynë për momentin është nën ndikim të masave të ajrit me presion të ulët atmosferik… Ky presion do të krijojë kushte që të kemi mot jostabil. Do të kemi erë nga ana e jugut dhe jugperëndimit. Era e fortë kryesisht do të jetë prezente në pjeesën veriore të Dukagjinit në Istog, 20-25 metra për sekondë”, ka thënë ai.
Aliu ka thënë se në vikend pritet rikthimi i reshjeve të borës, si në viset malore ashtu edhe në ato të ulëta.
“Tani do të kemi reshje bore në vise me lartësi mbidetare mbi 1000 m kurse në viset mesatare dhe të ulëta do të ketë vetëm reshje shiu deri të premten Sigurisht që gjatë vikendit parashihet të ketë reshje bore edhe në vise të uëlta pasi do të kemi masa të ajrit të ftohta që do të vijnë në Kosovë. Gjatë natës do të kemi ngrica dhe ajo sasi e borës në vise të ulta do të jetë e qëndrueshme pasi do të kemi temperatura të ulëta. Java e fundit e janarit do të jetë tipike dimërore”, ka deklaruar ai.
