Nënkryetarja e PDK-së, Vlora Çitaku ka reaguar pas paralajmërimit të presidentit francez Macron, se politika e vizave mund të rishikohet “nëse Kosova e Serbia nuk sillen me përgjegjësi”.
Çitaku ka shkruar se kjo deklaratë duhet të merret seriozisht nga Qeveria.
“Prandaj, përtej kritikës dhe politikës ditore, kjo është një këshillë për Qeverinë. Askush nuk po iu kërkon të veproni kundër interesit të shtetit dhe qytetarëve tanë”, ka shkruar Çitaku.
Ajo ka shtuar se pas masave të ndërmarra nga BE, rishikimi i liberalizimit të vizave do të ishte tejet dëshpërues për qytetarët.
“Kuptojeni drejtë paralajmërimin e Presidentit Macron, veproni me përgjegjësi dhe mos ua cenoni lirinë e lëvizjes qytetarëve të Kosovës – të merituar dhe të pritur prej shumë vitesh!”, ka shkruar ajo.
