Ministria e Industrisë, Ndërmarrësisë, Tregtisë dhe Inovacionit (MINTI) ka bërë të ditur se është duke monitoruar me vigjilencë të shtuar rritjen e çmimeve të derivateve të naftës nga operatorët ekonomikë që merren me tregtimin e tyre.
Sipas njoftimit, Inspektorati Qendror i Mbikëqyrjes së Tregut ka intensifikuar kontrollet në të gjithë territorin e vendit, përmes inspektimeve të përditshme në terren, me qëllim mbrojtjen e konsumatorëve dhe parandalimin e abuzimeve të mundshme.
Ministria thekson se Kosova është vend importues i derivateve të naftës dhe se lëvizjet e çmimeve në tregjet ndërkombëtare reflektohen drejtpërdrejt në tregun vendor. Megjithatë, këto ndryshime duhet të jenë në përputhje me standardet e përcaktuara në Ligjin nr. 08/L-018 për Tregtinë me Produkte të Naftës dhe Karburanteve të Ripërtërishme.
MINTI paralajmëron se mbikëqyrja do të vazhdojë edhe në ditët në vijim. Në rast të luhatjeve të menjëhershme dhe të pajustifikuara të çmimeve në pikat e shitjes, Ministria do të shqyrtojë mundësinë e marrjes së një vendimi për rregullimin e çmimeve dhe vendosjen e masave shtesë mbrojtëse.
Në këtë proces mund të përfshihen edhe Dogana e Kosovës dhe Administrata Tatimore e Kosovës, për të garantuar zbatim të plotë të ligjit dhe transparencë në treg.
Ministria shpreh përkushtimin për mbrojtjen e konsumatorit, forcimin e konkurrencës së ndershme dhe rritjen e transparencës në treg. Qytetarët ftohen të raportojnë çdo parregullsi apo mashtrim të mundshëm në numrin pa pagesë 0800 11000 ose në emailin zyrtar: [email protected]/teve1.info/
