Qendra Kombëtare për Menaxhim Kufitar në Kosovë ka lëshuar një njoftim me rëndësi të veçantë për të gjithë qytetarët, e në veçanti për mërgimtarët që planifikojnë të udhëtojnë nëpër Kroaci gjatë fundjavës së ardhshme.
Sipas autoriteteve kroate, të shtunën, më 5 korrik 2025, në kryeqytetin Zagreb do të mbahet një koncert gjigant në ajër të hapur, ku pritet të marrin pjesë rreth 500 mijë vizitorë. Kjo ngjarje pritet të ketë ndikim të madh në trafikun rrugor, jo vetëm në qytet, por edhe në rrugët kryesore që çojnë drejt Zagrebit.
-
Autostradat A2, A3 dhe A4, që lidhin Zagrebin me qytete të tjera;
-
Autostradat A1 dhe A6, që vijnë nga jugu drejt kryeqytetit;
-
Rruga anësore e Zagrebit, ku parashikohet një fluks i lartë automjetesh.
Autoritetet kroate kanë paralajmëruar se trafiku do të jetë jashtëzakonisht i ngarkuar nga 4 deri më 6 korrik, veçanërisht gjatë natës nga e shtuna në të dielën. Brenda qytetit do të ketë bllokime të shumta rrugësh, për shkak të masave të përkohshme të menaxhimit të trafikut, si dhe pritet lëvizje e dendur e automjeteve dhe këmbësorëve.
Në njoftimin e Qendrës Kombëtare për Menaxhim Kufitar thuhet:
“Duke pasur parasysh bllokimin e pritur në rrugët kryesore, ne këshillojmë të gjithë turistët që planifikojnë udhëtime rrugore përmes ose nëpër Zagreb – qoftë gjatë rrugës për në destinacionet turistike kroate ose duke u kthyer nga destinacionet kroate në vendet e tyre të origjinës – të planifikojnë udhëtimet e tyre një ose më shumë ditë para të shtunës, 5 korrik 2025.”
Po ashtu, qytetarëve u rekomandohet të qëndrojnë të informuar në lidhje me gjendjen e trafikut duke ndjekur:
Programin e Dytë të Radios Kroate (në gjuhën angleze),
Faqen zyrtare të HAK: www.hak.hr,
Aplikacionin “Croatia Traffic Info” për pajisje mobile.
Qendra Kombëtare për Menaxhim Kufitar apelon për kujdes dhe planifikim të udhëtimit me kohë, në mënyrë që të shmangen vonesat dhe ndërlikimet gjatë kalimit nëpër Kroaci këtë fundjavë.
