Gjykata Themelore në Ferizaj, Departamenti i Krimeve të Rënda ua ka caktuar masën e paraburgimit prej një muaji 14 prej 15 të arrestuarve, të enjten dhe të premten, në kuadër të hetimeve për rastin “Brezovica”.
Ata dyshohet se kanë kryer vepra penale të ‘fajdes’, ‘shmangies nga tatimi’ dhe të tjera.
“Gjyqtari i procedurës paraprake i Departamentit për Krime të Rënda kërkesën e prokurorit të shtetit për caktimin e masës së paraburgimit kundër katërmbëdhjetë (14) të dyshuarve: B.S., F.S., E.S., A.S., Sh.R., L.H., R.A., M.A., K.G., A.M., B.O., B.A., N.A., Sh.H., e ka aprovuar si të bazuar dhe të njëjtëve i`u është caktuar masë e paraburgimit në kohëzgjatje prej një (1) muaji për secilin veç e veç, konform dispozitave ligjore të Kodit të Procedurës Penale të Republikës së Kosovës, për shkak të dyshimit të bazuar se të pandehurit kanë kryer veprat penale të përshkruara më lartë”, thuhet në njoftimin e Gjykatës Themelore në Ferizaj
Kurse të dyshuarit S.B, i është caktuar vetëm masë e sigurisë, ndalim për t`iu ofruar vendit apo personit të caktuar në kohëzgjatje prej 1 muaji.
“Me këtë rast palët njoftohen se ankesa kundër këtij aktvendimi nuk e shtynë ekzekutimin e tij”, sqarohet në vendim.
